zrupft san meine hoar

 

und wurschd is ma

 

wei mei orbeid is s‘möcha

 

und meine schof und meine goaß

 

kennan mi ned kündign

 

 

 

zrupft san meine hoar

 

und wurschd is ma

 

wei i bin in da kaskuchl

 

und da lemsmitlinschpekta

 

hod ma a hoarnetz vaschribn

 

 

 

zrupft san meine hoar

 

und wurschd is ma

 

wei i ge jezd schpreissl hokka

 

und in da winzigklanen hoizhitn

 

is sowiso nua plodz fia oan

 

 

 

zrupft san meine hoar

 

und wurschd is ma

 

wei mia dan heign

 

und beim daunarecha in da voin sunn

 

hobi an schtrohuad aufm kobf

 

 

 

zrupft san meine hoar

 

und wurschd is ma

 

wei d’bauanbuam schaun ma nochi

 

ois zuagroaste bisd praktisch eksotisch

 

kwasi automatisch erotisch

 

 

 

zrupft san meine hoar

 

und wurschd is ma

 

wei si dan mea drin dafongd

 

vo di heibleamln

 

vom pferdeschtaub

 

vom gruch noch frischgschlogenem hoiz

 

vom wind dens iwan berg ummawaad

 

 

von oim des wos i mog

 

 

 

zrupft san meine hoar

 

und wurschd is ma nimma

 

wei i ned amoi mid di finga

 

durch di füzign zoodn foan ko

 

und mia traamd gauns schiach

 

vo da schofschermaschin scho

 

 

 

di finga bleibn schtekka

 

und d’hoarbirschdn erst rechd

 

drum muas i mein mau wekka

 

oba mia ned höfa mechd

 

 

 

d‘hoarbirschdn vaschwint in seine großn prodzn

 

ea foat iwa mei kobfhaud wia mid an schmirglpapia

 

und reisst an meine hoar und jo, zarupft ma di ridscha

 

oba i frog mi im schdün, schtedsis des wirkli dafia?

 

 

 

oba i deng

 

a so ane

 

so a ziagadeschmirgladezupfaderupfade

 

berürung

 

vo meim mau

 

is bessa

 

ois wia

 

goa kane