ma woass ned so genau:

 

hoda scho länga koa glik

 

oda ligds an seim triabn blik

 

oda is da oide jaga

 

oafoch a owizara

 

 

 

werd amoi aus eam schlau!

 

 

 

ma woass ned so genau:

 

wiavü kugln homs wüd scho vaföd

 

und ea hod nigs davo ned dazöd

 

(wei drüba redn is a schaund)

 

oda hoda a zidrige haund?

 

weila hoamli zvü trangld

 

oda weisn boid bangld?

 

 

 

werd amoi aus eam schlau!

 

 

 

ma woass ned so genau:

 

is eam da berg scho z‘hoch

 

oda vüz diaf da boch

 

is a z’schmoi da schteig

 

oda da woidweg z’weid

 

drukan eam vileichd d’schuach

 

oda hoda vo oim oafoch gnuach

 

 

 

werd amoi aus eam schlau!

 

 

 

ma woass ned so genau:

 

is bei seim hochschtond d’loata dafeud

 

oda hod eams ohukka scho voi ogfeud

 

is eams göd fiad munidsjon ausgaunga

 

oda gschbiada fias hiaschragu koa verlaunga

 

 

 

werd amoi aus eam schlau!

 

ma woass ned so genau

 

 

 

jednfois beschdöda bei mia telefonisch

 

(und i woass ned, i find des glei komisch)

 

a kidzfleisch, owa

 

(und des heda si genau ibalegd)

 

bitschee nua grob zalegd

 

waun des ged?

 

 

 

„ged ned“ gibds ned

 

kumm i eam

 

mitn bledn vakäufaschmä

 

(und der tuad we)

 

und am schlochtog

 

kummd er

 

z’fuas zu uns am hof

 

mit di goaß und mit di schof

 

 

 

uman hois ghengt

 

hoda

 

an mordsdrum gukka

 

so schwaa

 

dassd moanst

 

ea muas si glei buka

 

wei eams gwichd vo da swarofski linsn

 

so firizad

 

und schif ge duada nu dazua

 

wia vom wind vawaad

 

wei ind linke schuita

 

schneit eam

 

da schmole ledaream

 

vom jogdgeweer

 

und am bugl trogda

 

den grean ruksog

 

aus seina zeit ois pionia

 

beim bundesheer

 

 

 

und so schteda vor mia

 

(und nebn eam schted sei dakl)

 

und wü des kidzfleisch

 

eipokt hom

 

in a plastiksakl

 

(dawei hedi di z’hauf

 

di schmukn direktvamorktaschochdln

 

mitn eeuubiologo vurn drauf)

 

owa so

 

schtopfmas hoid

 

in sei greane buglkraxn

 

obn aussaschaun

 

dan nua mea

 

di bluadign endn

 

vo zwoa poa goaßhaxn

 

 

 

gschwind wü i kassian

 

owa er lossd si ned beirrn

 

(jezd geda ma scho aufn zaga, da jaga)

 

er hod jo vü zeid

 

er is jo scho oid

 

und er muasma

 

nu wos vazön

 

vo di vicha im woid

 

 

 

vo di re und vo di hiaschn

 

vo di muffin und vo di gams

 

vo di figs und vo di dags

 

hoid vo di vicha im woid

 

 

 

und seine augn leichtn

 

und sei gsicht

 

des schtroid

 

wirama vazöd

 

vo di vicha im woid

 

 

 

oiswia waunama

 

vo seine bestn freind

 

vazön darad

 

und auf oamoi

 

is do nigs mea

 

wos nu zum oklärn gabad

 

 

 

jezd werdi aus eam schlau

 

 

 

jezd woasis gauns genau

 

 

 

sei jogdflintn

 

is nua

 

a fintn

 

a gefinkelte

 

sei jogdgweer

 

is nua

 

a optische teischung

 

mid züfernroa

 

a tarnkopn

 

a unsichtbore

 

a gorillataktik

 

a ausgfugste

 

 

 

a kamoflaasch

 

passad

 

zu seim gwond

 

passad

 

zu oim

 

wiasd

 

zum sei hosd

 

damidsd

 

bist

 

wiasasi

 

khead

 

wensd

 

sei wüsd

 

bei di vicha

 

im woid

 

 

 

narrisch

 

mocht mi nua

 

und des lossd ma koa rua:

 

seine leid z‘haus

 

mochts eana nigs aus?

 

is da hunga schtärka

 

dass den untaschid ned merka?

 

ned vo ana regoaß

 

vo ana müchgoaß

 

is des kidz

 

bis ma eischiassd

 

wira blidz:

 

sei famülije

 

isst jo

 

wegetarisch