mei freindin

 

is esoterisch

 

und

 

e so derrisch

 

warum mia

 

di disgusjon

 

mid ia

 

übas lebn nochm tod

 

heid grod nu gföd hod

 

 

 

zersd is di disgusjon

 

a weng hadschad

 

mia hom hoid so

 

vor uns hipalawad

 

bis dass ma noch an zeidl sogd

 

dass ins jenseids umiluaga kau

 

und do hob i nochgfrogt

 

wias mas beschreibt

 

gauns dezidiert:

 

wos is

 

wensa si iad?

 

 

 

des hobi im gschbia

 

sogd si

 

waun i mi ia!

 

und gegn bauchgfü und gschbia

 

hob i koa argument ned dafia

 

warum i mia laung und breit

 

wos ohurcha kau

 

wia si do red gauns gscheit

 

üwa di pauschalreise ins nirwana

 

so vü drüba wissn wia si

 

tuad do sunst kana

 

 

 

und si hod des büd vor ia:

 

di bliradn obstbaam in ana rei

 

untan blauen hümmi a gmaade wiisn

 

di viakanta mid an heirign vor da tia

 

und in da luft da duft vom belaflorablumenschmugg

 

 

 

do füsd di glei scho

 

fost wia zhaus!

 

sogd si

 

jo owa

 

frog i

 

hm?

 

mocht si

 

wiaso

 

schrei i

 

schauts paradiis

 

wias mostviadl aus

 

 

 

und i hob des büd vor mia:

 

in da luft da duft vo heamist und güllegruabn

 

di bauankeischn mid di silobunka vor da tia

 

untan blauen kunstdungdeppich di gugaruzföda

 

und olle boa meta a kreisvakeer

 

 

 

do warads worscheinli gscheida

 

i gangad wida zur kirchn dazua

 

do kamad i vileichd weida

 

und hedad mei sö a rua

 

 

 

do kunntad i mid di engal

 

auf woikn umadumhupfa

 

aunschtod auf ewig

 

den mostviadla oidog

 

daschupfa

 

 

 

aussa

 

i kamad

 

owi zu di bengal

 

aunschtod

 

aufi zu di engal

 

dann is oans figs

 

wos i waas:

 

des warad

 

a nu a

 

gressara

 

schaas